कर्ममा ज्यूँछु सधैं, मलाई जून नमाग
अहिंसामा विश्वाश गर्छु, कसैको खून नमाग

यथार्थतामा बाँच्नु पर्छ, हामी सबै मिलिकन
खान-लाउन दिऊँला गहना-सून नमाग

सक्दिन म त सिर्जन संगीतका धूनहरू
तिमी नजिक आइकन, मलाई धून नमाग

धेरै सहयोग ग-यौ तिम्ले मेरा अप्ठ्यारामा
के दियौ भनी फिर्ता, लाएको गुन नमाग

तिम्रो याद आउँदाखेरि म त साह्रै टोलाएछु
सपनी मै उडी गई तिमीमा नै हराएछु

तिम्रो पत्र पढ्दा-पढ्दै म त साह्रै रोएपछि
स्मृतिमा तिम्रो अनुहार राखेर नै निदाएछु

तिम्रो समिप उडी जाने मन मेरो भएपछि
मेरो मनको रानी मैले तिमीलाई नै बनाएछु

माया गर्छु भन्दा-भन्दै,तिमीले मलाई बिर्सेपछि
मनभरि जलन बोकी,आँसु धेरै बगाएछु

किन लाग्छ मलाई,म तिम्रो मायामा परेर
आफू जल्ने चिता मैले आफैंले नै सजाएछु

मेरो जीवनमा तिमी नै आए हुन्थ्यो लाग्यो
सपनाको मीठो महल छाए हुन्थ्यो लाग्यो

अझै नजीक आइकन अंगालोमा कसी
मायाप्रीतको गीत सधैं गाए हुन्थ्यो लाग्यो

मनमुटुमा डेरा लिइ बसिसकेपछि
तिमीलाई अझै समिप पाए हुन्थ्यो लाग्यो

तिमिले पनि माया गर्छु भनिसकेपछि
जुगौं साथ दिन कसम खाए हुन्थ्यो लाग्यो

हाम्रो प्रीतमा भाँजो हाल्ने धेरै भएपनि
अजम्मरी बुटी तिम्ले नै ल्याए हुन्थ्यो लाग्यो